Balade 344 : Qui veult veoir tresjolie maison (CCCCLIV)

Autre Balade

                        Qui veult veoir tresjolie maison
                        En lieu plaisant et de belle ordenance,
                        Pour demourer la nouvelle saison
                        Et ou droit cuer du royaume de France,
5                      Boys et yaue, jardins en habondance,
                                    Et, pour avoir le deduit
                        […]
                        De tous oisiaux, le mondain paradis,
                        Des fontaines la biauté et le bruit,
10                    A Bievre voit, a trois lieues de Paris.

                        La place est fort et de noble cloison :
                        Emmy l’estang ou le donjon se lance
                        Trois tours y a de pierre et de moillon,
                        A trois debous, dont chascune s’avance,                                          152b
15                    Aux quatre pans font escu et deffence.
                                    Mais la sont noble conduit
                        Par lesquelz l’yaue en l’ostel se conduit.
                        Sales, chambres y a de grant devis.
                        Qui tous biens veult avoir, si com je suit,
20                    A Bievre voit, a .iii. lieues de Paris.

                        L’en y puet bien recouvrer du poisson.
                        La basse court fait asséz pourveance
                        D’avoir poucins, poullaille et maint oison,
                        Grain pour chevaulx, coulombier de plaisance,
25                    Granche tresgrant et prez a souffisance,
                                    Garanne qui riens n’y nuist,
                        Cave dehors ou le froit vin se duist,
                        Entr’e fort et puissant pons leveis.
                        Qui se vouldra bien logier, mais qu’il puist,
                        A Bievre voit, a trois lieues de Paris.