Balade 343 : Pymalyon qui fist la belle ymage (CCCCLIII)
Autre Balade
Pymalyon qui fist la belle ymage
Qui depuis ot char et humaine vie,
Maistre Ypocras, ne Philemon le saige,
Qui jurerent toute phisonomie,
5 Argus qui cent yeux avoit,
Ne Socrates qui saigement parloit,
Ymaginer ne veir ne pourroient,
Dire, penser ne jugier ne sauroient
Le bien, l’onneur, la biauté et les mours,
10 Dame, de vous. Mais croy qu’ilz y faudroient.
Pour ce vous tien la deesse d’amours.
Merveilleux suy de vo gentil corsage
Ou Nature a mis toute s’estudie,
De voz vers yeux, de vo tresdoulx visaige,
15 Du doulx parler qui a tous s’umilie, 152a
Comment vostre honneur reçoit
Tous estrangiers et humblement les voit.
Jamais de ce taire ne se pourroient
Maint grant seigneur qui vous ont veu et voient,
20 Qui vous tiennent la flour de toutes flours
Si qu’au monde meilleur n’espereroient.
Pour ce vous tien la deesse d’amours.
Noble rapport font de vous li messaige,
De vostre sens, de vostre belle vie,
25 De vostre atour ou il n’a nul oultrage,
De vo pouoir, de vo noble lignie.
Helas ! et qui s’en tairoit ?
Tout malade de vous vir gueriroit,
D’un seul regart tous devoiéz ravoient,
30 Dix [et] huit ans, non pas plus, vous convoient,
La douçour estes de trestoutes douçours.
Tous ceulz qui sont voz biens ne descriproient.
Pour ce vous tien la deesse d’amours.
