Balade 342 : Vous qui vouléz les armes frequenter (CCCCLII)
Autre Balade
Vous qui vouléz les armes frequenter,
Dames, amours et en noble frontiere,
Il vous convient venir a Saint Omer.
La vous feront les dames bonne chiere :
5 Qui veult honneur en ses marches le quiere,
Car d’elles tout bien decourt.
Mariete voit veoir de la Court,
Et Griele sa tresdoulce compaigne.
Lors hardement ara, s’il n’est trop lourt,
10 Pour faire un preux comme Artus de Bretaigne.
Car belles sont et humbles en parler,
De noble atour et de seure maniere,
Doulces, chantans, gentes a karoler,
Et honorans toute gent estrangier[e]. 151d
15 La fault qu’amours et vaillance se fiere
En cuer d’omme ou honneur sourt,
Et qu’a Ardre voit lors faire son hourt,
Pres de Calays. De s’amour lui souviengne,
Ait cuer hardi, s’il vient au beheourt,
20 Pour faire un preux comme Artus de Bretaigne.
Soit chevauchans, face de lui parler,
Quant tempssera, son ennemi requiere
Vigreusement[1], tant qu’il le puist mater,
Et que grant pris et louenge en acquiere.
25 Grant joye aura adonc sa dame chiere,
Se bon renom de lui court
Par le pays et a la royal court.
Bien festoiéz yert quelque part qu’il viengne.
Saiges est donc qui en tel marche acourt
30 Pour faire un preux comme Artus de Bretaigne.
[1] Ms. viguereusement
