Balade 341 : Se je peusse avoir par souhaidier (CCCCLI)
Autre Balade
Se je peusse avoir par souhaidier,
Je souhaidasse dame jeune et jolie,
Qui bien m’aymast de vray cuer et entier
Et qui toudis me feust loyal amie.
5 Et que je peusse en un certain lieu prendre
Tousjours cent solz, tant n’en seusse despendre.
Et se ces poins et autres .ii. avoie,
Jour dema vie plus ne souhaideroie.
L’un des deux poins, que j’eusse coursier 151c
10 Si tost alant que plus tost ne feust mie,
Et bon roucin trotant, fort et legier,
Et trois levriers tous d’une compaignie,
Si bien tailléz qu’il n’y eust que reprendre,
Et qu’en tous lieux feissent lievre rendre.
15 Et je vous jur que s’avoir les pouoie,
Jour de ma vie plus ne souhaideroie.
Fors tant que ce durast sanz empirier[1]
En son estat, tant com j’aroie vie,
Et que nulz homs ne peust convoitier
20 Sur mes souhais, n’estre surpris d’envie.
Lors me verriéz gaye vie entreprendre,
Estre joliz et amer sanz mesprendre,
Chanter, dancer. Et puis que tel seroie,
Jour de ma vie plus ne souhaideroie.
[1] Ms. espirier
