Balade 340 : De tous amans suis le plus fortunéz (CCCCL)

Autre Balade

                        De tous amans suis le plus fortunéz
                        Et qui moins ay eu d’amoureuse vie,
                        Combien que j’aye, depuis que je suy nez
                        Et que j’oy sens, amé sanz villenie.                                                   151b
5                      Mais je ne poy oncques trouver partie
                        Ou mes cuers puist joieusement partir,
                        Qui de ce monde mon corps departira,
                        Puis qu’a[1] ma dame mon cuer ne partira ?

                        En amours suis durement estrenéz,
10                    Quant je ne puis trouver dame et amie.
                        Et pluseurs voy, dont je suis forcenéz,
                        Qui en brief temps a ce ne faillent mie.
                        Il a long temps qu’ay mis mon[2] estudie
                        En un seul lieu dont ne puis departir,
15                    Si que de moy la mort ne partira,
                        Puis qu’a ma dame mon cuer ne partira.

                        Dont vient ce droit, que li uns est améz
                        Soudainement, et q’un petit ne prie,
                        Et l’autre[s] est en amours regettéz
20                    Qui ayme fort, qui bien sert, qui supplie ?
                        C’est fol plaisir et grace qui folie
                        Ygnoramment, quant ne scet remerir.
                        <Pour ce est Amour, dame, qui doit merir,>[3]
                        Sanz lesquelz deux tout mon fait perira,
25                    Puis qu’a ma dame mon cuer ne partira.

[1] Ms. quadez

[2] Ms. en

[3] Vers surnuméraire