Balade 339 : Je vous gracy et mercy humblement (CCCCXLIX)

Balade

                        Je [vous] gracy et mercy humblement,
                        Tresdoulce dame, tant com je puis et sçay,
                        Du doulx respons fait amoureusement,
                        Et du rondel tresamoureux que j’ay,
5                      Qui me nourrist et me gette d’esmay,
                        Et qui me fait vivre en telle esperance
                        Que de moy n’est plus amoureux en France.
                        Car je me voy assené haultement,

                        En corps gentil, fresche, plaisant et gay,
10                    De biau maintien, de gent contenement,
                        Ferme, secré, humble, loyal et vray,
                        Dont je vous jur qu’en tous cas vous seray
                        Bon et loyaulx, de ce n’aiéz doubtance,
                        Car de moy n’est plus amoureux en France.

15                    Or ne vueillés faulx rappors nullement
                        Croire de moy, car je ne fausseray
                        Vers vous m’amour, mais si desloyalment
                        Regne au jour d’uy Envier que je n’ay
                        Autre paour. Et pour ce soufferray
20                    Tant qu’au dessus vendray par ma souffrance,
                        Car de moy n’est plus amoureux en France.