Balade 336 : Comment pourroit avoir mon cuer leesce (CCCCXLVI)

Autre Balade

                        Comment pourroit avoir mon cuer leesce
                        Si je mespris en regart nullement,
                        Par le cuider ma dame et ma deesse[1],
                        Qui ne scet pas mon certain mouvement,
5                      Dont le regart fu fait estrangement ?
                        Avoir nel puis, mais tous temps garder vueil
                        S’onneur, sa paix, tresamoureusement,
                        Cent mille foiz asséz plus que ne sueil.

                        Car Bien Celer et Amour qui me blesce                                             150c
10                    M’ont fait gecter les yeux senestrement,
                        Afin que nulz ne puist choisir l’adresce
                        De celle a qui suy homme ligement.
                        Or la reçupt desagreablement,
                        Moy cuidant faulx, dont j’ay courroux et dueil.
15                    Payne senti et douloureux tourment
                        Cent mille foiz asséz plus que ne sueil.

                        Pour ce suppli a Pité qu’el m’adresce
                        Devers ma dame, et que piteusement
                        Lui plaise oster la tristeur qui me blesce,
20                    Qui riens n’ay fait qu’a honneur vraiement.
                        Son doulz pardon requier benignement.
                        S’a lui eschiet, et pugnisse bien l’ueil.
                        Si en vivray du cuer plus liement
                        Cent mille foiz asséz plus que ne sueil.

[1] Ms. leesce