Balade 335 : Tresdoulce dame ou sont tuit my desir (CCCCXLV)

Balade

                        Tresdoulce dame ou sont tuit my desir,
                        Tuit my penser et toute m’esperance,
                        Mon bien mondain, mon singulier plaisir.
                        Ma deesse ou j’ay ferme creance,
5                      Vo babalde m’a fait moult de plaisance.
                        Mais du depart n’est il ne sera rien,
                        Et, se Dieu plaist, vous le saveréz bien.

                        Sur toutes autres a veoir vous desir,
                        Mon cuer avéz, et ne faictes doubtance
10                    Que de vous veir prendray tost le loisir.
                        Si ne devéz avoir desesperance :
                        Onc ne vous fis ne feray decevance,
                        Car ma dame souveraine vous tien :
                        Et, se Dieu plaist, vous le saveréz bien.

15                    Or vous vueillés liement maintenir
                        Et delaissier yre, dueil et grevance
                        Et desconfort qui fait chascun fenir.
                        Joye prenéz, plaisir et souvenance.
                        Tout vostre suy, je le vous convenance,
20                    Sanz departir, autre part n’y retien :
                        Et, se Dieulx plaist, vous le saveréz bien.