Balade 334 : Armes, amours, deduit, joye et plaisance (CCCCXLIV)
Autre Balade
[Mai 1389]
Armes, amours, deduit, joye et plaisance,
Espoir, desir, souvenir, hardement,
Jeunesce aussi, maniere et contenance,
Humble regart trait amoureusement,
5 Genz corps joliz, paréz tresrichement.
Aviséz bien cette saison nouvelle,
Ce jour de May, ceste grant feste est[1] belle
Qui par le roy se fait a Saint Denys. 150a
A bien josuter gardéz vostre querelle
10 Et vous seréz honnoréz et cheris.
Car la sera la grant biauté de France,
Vint chevaliers, vint dames ensement
Qui les mettront arméz par ordenance
Sur la place, toutes d’un parement,
15 Le premier jour. Et puis secondement
Vint escuiers, chascun sa damoiselle,
D’uns paremens, joye se renouvelle.
Et la feront les heraulx pluseurs cris
Aux biens joustans. Tenéz fort vostre selle,
20 Et vous seréz honnoréz et cheris.
Oy y perra qui bien ferra de lance
Et qui sera de beau gouvernement
Pour acquerir d’Amour la bienvueillance,
Et qui durra ou harnois longuement :
25 Cilz ara los. doulz regart proprement
Le monstrera. Amour, qui ne chancelle,
L’enflambera d’amoureuse estincelle.
Honneur donrra aux mieulx faisans les pris.
Aviséz tous ceste doulce nouvelle,
30 Et vous seréz honnoréz et cheris.
L’envoy
Servans d’Amours, regardéz doulcement
Aux eschaffaux anges de paradis,
Lors jousterés fort et joyeusement,
Et vous seréz honnoréz et cheris.
[1] Saint Hilaire corrige en et
