Balade 333 : Tant me fait mal de vous la departie (CCCCXLIII)

Autre Balade

                        Tant me fait mal de vous la departie
                        Que mon penser ne puet de vous partir,
                        Pour vo grant bien, chiere suer et amie.
                        Mon cuer avéz pour vo depart martir
5                      Quant ne vous voy. Vueille vous souvenir
                        Aussi de nous et de nostre aliance,
                        Et en tout bien vous vueillés maintenir,
                        Et gardéz bien ou vous aréz fiance.

                        Car au jour d’uy est tant de tricherie
10                    Que l’en ne doit son penser descouvrir
                        A homme nul, non pas a sa nourrie.
                        Car ou bien est veult l’en le mal querir.
                        Tousjours se doit saige dame couvrir                                               149d
                        Et pou parler, garder sa conscience.
15                    Or vous plaise sur ces poins advertir,
                        Et gardéz bien ou vous aréz fiance.

                        Mais quant a moy doubter ne devéz mie,
                        Car vostre honneur comme le mien desir.
                        De vostre estat me mandéz, je vous prie,
20                    Souventes foiz, si me feréz plaisir.
                        Et je du mien vous referay sentir
                        Si qu’en nous deux ne se fiere oubliance.
                        D’escripre a moy prenéz vostre loisir,
                        Et gardéz bien ou vous aréz fiance.

                        L’envoy

30                    Treschiere suer, trop plaing vo departir
                        Qui m’a au cuer navré sanz deffiance.
                        De voz doulz mos me vueillés repartir,
                        Et gardéz bien ou vous aréz fiance.