Balade 332 : Qu’est ce d’amours ? ― Aymes, tu le saras (CCCCXLII)

Autre Balade amoureuse

                        Qu’est ce d’amours ? ― Aymes, tu le saras.
                        ― J’ayme. ― Tu scez donques que c’est d’amer ?
                        ― Certes, c’est voir. ― S’il te plaist le diras.
                        ― C’est doulx desir converti en amer,
5                      C’est souvenir qui m’a mis en la mer,
                        Le doulz plaisir qui pensers me depart
                        Par les biaux yeux dont je me doy clamer,
                        Et tout me vient par un tresdoulz regart.

                       ― Je te voy pris. Or me dis que feras.
10                    Puet ton desir a ta dame parler ?
                        ― Certes nennil. ― Chetif, tu languiras.
                        Voy quelle amour ou tu n’oses aler,
                        Et qui te fait si parfont avaler
                        Ou soubtil feu qui tout destruit et art.
15                    Que respons tu ? ― Je languis, c’est tout cler,
                        Et tout me vient par un tresdoulz regart.

                        Conseille moy. ― Ne scay que tu feras.
                        ― Oil. ― Je vueil… ― Et quoy ? ― Toy commander :
                        Retray ton cuer. Par ce guerir pourras.                                             149c
20                    ― Impossible est. ― Donques te fault hanter
                        Ta dame fort et lui dire ou mander
                        Ce que tu sens pour elle, maint et tart.
                        ― Je le feray. Trop me fait tourmenter,
                        Et tout me vient par un tresdoulx regart.

                        L’envoy

25                    Prince, bien say, plus ne vueil demander
                        Que c’est d’amour. J’en ay dolente part.
                        ― Le scez tu bien ? ― Oïl, ne puis durer,
                        Et tout me vient par un tresdoulx regart.