Balade 331 : Le droit jour d’une Penthecouste (CCCCXLI)

Balade amoureuse comment l’amant a un jour de Penthecouste ou moys de may, trouva s’amie par amours cueillant roses en un jolis jardin

                        Le droit jour d’une Penthecouste,
                        En ce gracieux moys de May,
                        Celle ou j’ay m’esperance toute
                        En un jolis vergier trouvay
5                      Cueillant roses, puis lui priay :
                        Baisiéz moy. Si dit : ―Voulentiers.
                        Aise fu. Adonc la baisay
                        Par amours, entre les rosiers.

                        Adonc n’ot ne paour ne doubte,
10                    Mais de s’amour me confortay.
                        Espoir fu des lors de ma route,
                        Ains meilleur jardin ne trouvay,
                        De la me vient le bien que j’ay,
                        L’octroy et li doulx desiriers
15                    Que j’oy, comme je l’acolay,
                        Par amours, entre les rosiers.

                        Cilz doulx baisier oste et reboute
                        Plus de griefz que dire ne say
                        De moy. Adoucie est trestoute
20                    Ma douleur. En joye vivray.
                        Le jour et l’eure benistray
                        Dont me vint li tresdoulx baisiers,
                        Quant ma dame lors encontray
                        Par amours, entre les rosiers.                                                            149b

                        L’envoy

25                    Prince, ma dame a point trouvay
                        Ce jour, et bien m’estoit mestiers.
                        De bonne heure la saluay,
                        Par amours, entre les rosiers.