Balade 329 : Joye, delit, leesse, esbatement (CCCCXXXIX)

Autre Balade

                        Joye, delit, leesse, esbatement,
                        Chanter, dancer, ne nulle rien que j’oye,
                        Ne me peuent resjoir nullement
                        Ne faire bien, quelque part que je soie,
5                      Sanz vous, dame, ne jamais bien n’aroie,
                        Se ce n’estoit quant doulx penser me vient
                        Et souvenir, ne vivre ne vouldroie
                        Fors quant je harpe et de vous me souvient.

                        Lors me membre du doulx contenement,
10                    Du gentil corps de vous, tresbelle et quoye,
                        De voz doulz yeux, du viaire plaisant,
                        Du doulz parler qui ma douleur resjoie,
                        De voz grans biens que dire ne saroie,
                        Dont loing de vous trop languir me convient
15                    Tant que mon cueur souvent en pleur se noie,
                        Fors quant je harpe et de vous me souvient.                                   148d

                        Si vous suppli, belle et bonne, humblement
                        Que pitéz soit toudis en vostre voie
                        Pour moy, qui aym si amoureusement
20                    Vostre doulx nom, que vis m’est que je voie
                        Vostre gent corps tousjours, si ne pourroie
                        Sanz vous durer pour l’amour qui me tient.
                        S’espoir n’estoit, de tous poins languiroie,
                        Fors quant je harpe et de vous me souvient.