Balade 328 : Tant est ferus doulz penser en mon cuer (CCCCXXXVIII)
Autre Balade
Tant est ferus doulz penser en mon cuer
Que nullement ne s’en puet departir
Quand loing me voy de ma dame d’onneur.
Mais quant je doy reposer et dormir,
5 En songe voy celle que je desir,
Qui toudis a mon cuer en sa baillie.
Et lors suy je hors de melencolie
Et ay tel bien que dire nel pourroie.
Mais s’il avient que je ne dorme mie,
10 Mon corps languist, quelque part que je soie.
Car sur la mer playne de tenebreur
Me fault manoir et ne m’ose partir
Ou l’air est gros, et la sont my seigneur,
Qui au traittié me font estre martir.
15 Quant je veille, ma joye fault perir
Qui en douleur est trop ensevelie
Pour le depart de ma dame jolie.
Donc revenir a mon songe vourroie,
Car se le jour n’est mué en nuitie
20 Mon corps languist, quelque part que je soie.
C’est ce qui fait amatir ma couleur,
Plaindre mon temps, ma joye aneantir,
Et regreter vostre tresgrand douceur,
Vostre grant bien et beauté en desir.
25 Las ! doulx penser me fait souvent gesir
Plus que le droit, pour avoir en partie 148c
Ce doulz songe que nul temps ne m’oublie,
Ains tient mon cuer en tresparfaite joye.
Quant je ne l’ay, pis ay que perdre vie.
30 Mon corps languist, quelque part que je soie.
L’envoy
Prince, pour Dieu faites a ma clameur
Ou guerre ou paix, car prest [bien tost] seroie
Pour retourner ou, par nostre Seigneur,
Mon corps languist, quelque part que je soie.
