Balade 327 : Tant est cilz jours au jour d’uy solennéz (CCCCXXXVII)

Autre Balade

                        Tant est cilz jours au jour d’uy solennéz                                           148a
                        Et tant y prent chascun pour ses amours
                        De biens, d’onneurs, de graces, de bontéz,
                        De louenges, de piteuses clamours,
5                      Pour estrener ces precieuses flours
                        Et ces dames, que je ne say ou prendre,
                        Pour bien louer celle ou est mes demours,
                        Ce que je doy pour mes estrenes rendre.

                        Mais neantmoins soit son corps estrenéz,
10                    A ce bon jour, des parfaites doulçours
                        Que desirent tous cuers qui sont améz,
                        Et en tous cas soit loué ses atours.
                        Honneur lui soit toudis chastiaux et tours
                        Si que de mal ne la puist nulz reprendre,
15                    Et Dieux m’envoit, par son piteux secours,
                        Ce que je doy pour mes estrenes rendre.

                        Helas ! qu’est ce ? C’est mes cuers destinéz
                        Pour lui servir, qui est siens a tousjours
                        N’oncques ne fu autre puis qu’il fu nez
20                    Ne ne sera. c’est toudis ses sejours.
                        La finera en lermes et en plours,
                        Com vray martir, se pitéz ne fait tendre,
                        Par doulx octroy, qu’elle prengne le cours
                        Ce que je doy pour mes estrenes rendre.

                        L’envoy

25                    Tresdoulce amour, ma dame, ymaginéz
                        Mon povre cuer, a ce vueillés entendre.
                        Plus riche don n’ay. Pour Dieu recevéz                                             148b
                        Ce que je doy pour mes estrenes rendre.