Balade 326 : Doulce com miel, blanche com fleur de lis (CCCCXXXVI)

Autre Balade

                        Doulce com miel, blanche com fleur de lis,
                        Coulouree comme rose vermeille,
                        Gente de corps, gracieuse de vis,
                        Qui en bonté n’avéz vostre pareille,
5                      Humble en regart, un chascun s’esmerveille
                        Qui vous congnoist de vostre grant biauté                                      147d
                        Et des vertus a quoy vostre cuer veille,
                        Dame d’onneur, de grace et de pité.

                        Voz parlers sont saiges et bien assis,
10                    Et Loyauté en tous cas vous conseille.
                        Grace vous suit, chascun vous est amis,
                        Qu’a toute honneur encline vostre oreille.
                        De vo doulçour est une grant merveille
                        Qui tous attrait, par son humilité,
15                    Les cuers des genz, sanz ce que nul s’en dueille,
                        Dame d’onnour, de grace et de pité.

                        Mais voz renoms queurt par tous[1] les pays,
                        Qui de tous biens les cuers arouse et moille[2],
                        Ne nulz ne puet estre en rien esbahys
20                    Qui hardement par vo nom ne recueille,
                        Et s’il vous voit que grace ne l’acueille
                        Par voz regars, qui tant ont prouffité
                        Qu’ilz ont parfait maint bon, vueille ou ne vueille,
                        Dame d’onneur, de grace et de pité.

                        L’envoy

25                    Prince, qui a tel dame, a vostre avis,
                        La doit il bien tenir en grant chierté ?
                        Oïl, par Dieu ! C’est tout mon paradis,
                        Dame d’onneur, de grace et de pité.

[1] Ms. tout

[2] Saint Hilaire corrige en mueille