Balade 325 : Tristesce fuit et joye me depart (CCCCXXXV)

Balade

                        Tristesce fuit et joye me depart                                                         147c
                        En doulz espoir vostre doulz mandement
                        Qui s’esjoit. Par sa douceur a part
                        Mon las de cuer qui attent longuement
5                      A vous veoir, et vous savéz comment
                        Je vous desir, non autre creature.
                        Si me vueillés allegier temprement,
                        Ou autrement suy a desconfiture.

                        Car vous estes toudis en mon regart
10                    Comme cellui qui vous voit proprement
                        Des yeux du cuer, mais trop me vient a tart
                        Le grant desir de vostre aprouchement.
                        Or me vueillés donner allegement
                        De vous veoir, s’aray ma nourriture
15                    Et plus de bien que n’ot oncques amant,
                        Ou autrement suy a desconfiture.

                        Je n’ay penser a toutre, main[1] ne tart,
                        Et puis[2] que j’aym si amoureusement.
                        Et vous aussi qui estes de ma part,
20                    Si com je tien, faictes prochainement
                        Que noz deux cuers soient joint tellement,
                        Par nous veoir, que ma durté tresdure
                        Se puist muer en bien joyeusement,
                        Ou autrement suy a desconfiture.

[1] Ms. iet maint

[2] Saint Hilaire corrige en Depuis