Balade 324 : Vous me priéz si amoureusement (CCCCXXXIV)

Autre Balade

                        Vous me priéz si amoureusement,                                                    147b
                        Par si doulz moz, par si belle maniere,
                        De si bon cuer et si treshumblement,
                        Que l’en doit bien oir vostre priere,
5                      Et se voz dis au cuer et a la chiere
                        Sont semblables, laquel chose ne sçay,
                        Car en doulz mos a souvent chose fiere,
                        Je vous respons que je m’aviseray.

                        Car dame doit octroier lentement
10                    Et doit s’amour et s’onnour tenir chiere.
                        Ne pas ne doit croire legierement
                        Ce c’om lui dit, ains doit faire barriere
                        D’oreille a sourt et soy tirer arriere
                        Du doulz parler, ou le venin veu ay
15                    Souventes foiz. S’il est qui me requiere,
                        Je vous respons que je m’aviseray.

                        Que dist Jazon et promist loyalment
                        A Medee, de s’amour tresoriere ?
                        Qu’il l’aymeroit. Et puis, desloyalment,
20                    La delaissa quant s’amour ot premiere
                        Pour autre amer. Nul tel vice ne quiere.
                        Dame ne doit soy mettre en tel essay,
                        Et pour ce aussi que n’en suy usagiere,
                        Je vous respons que je m’aviseray.

                        L’envoy

25                    Amant, amant, mieulx vaurroit estre en biere
                        Toutes dames, car bien dire oy ay[1],
                        Que croire tost. Afin c’om ne me fiere,
                        Je vous respons que je m’aviseray.

[1] Saint Hilaire corrige en l’ay