Balade 323 : Dame, tant ay de vous oy parler (CCCCXXXIII)

Autre Balade

                        Dame, tant ay de vous oy[1] parler,
                        De voz grans biens et de vo renommee,
                        Que je ne puis sanz vostre amour durer
                        Ne bien avoir. Mais chascune journee                                               147a
5                      De plus en plus croist m’amour en pensee,
                        Car de mon cuer ne se pert souvenir.
                        M’aymeréz vous, tresbelle et bieneuree ?
                        Responnéz moy sur ce vostre plaisir.

                        Mon cuer vous doing, mon corps vous veult loer,
10                    N’autre de vous n’yert [ja] de lui amee.
                        A vous se veult non a autre voer
                        Pour vous servir tant com j’aray duree.
                        Craindre, obeir, et d’amour si celee
                        Que nulz, fors vous, ne le pourra veir,
15                    Et en tout bien, chiere dame honnoree,
                        Responnéz moy sur ce vostre plaisir.

                        Et vueillés bien ces poins considerer
                        Tant que pitié soit pour moy en vous nee
                        Qui, par grace, me face octroy donner
20                    Du nom d’amy, humble fleur desiree,
                        Ou autrement de mot enlangouree
                        Pour vostre amour me convendra mourir
                        En grant doulour, telle yert ma destinee :
                        Responnéz moy sur ce vostre plaisir.

                        L’envoy

25                    Dame que j’aym, n’autre ne puis amer,
                        Pour un octroy par honneur requerir
                        Ne me laissiéz par vo deffault finer.
                        Responnéz moy sur ce vostre plaisir.

[1] Ms. oir