Balade 322 : Se tous les corps de tous les trespasséz (CCCCXXXII)

Autre Balade

                        Se tous les biens[1] de tous les trespasséz
                        Et de tous ceulz qui sont presentement
                        Et qui seront, estoient en santéz
                        Et vivoient jusques au jugement,
5                      L’onneur, leur senz, prouesce et hardement,
                        Et tous leurs fais seroient pou chery
                        Ne comparéz, a mon entendement,                                                  146d
                        Aux grans vertus de mon loyal amy.

                        A Solomon puet estre comparéz
10                    Pour son savoir, de biauté ensement
                        A Absalon et de force paréz
                        Au roy Hector et Sanson proprement,
                        A Senecques de meurs, d’enseignement,
                        Et a Paris, qui bien d’amours joy.
15                    Mais d’eulz trestous est nul le parlement
                        Aux grans vertus de mon loyal amy.

                        Filz est de roy, et c’est[2] roy courronnéz,
                        En tous ses fais se porte vaillamment.
                        Noble corps a, par tout est redoubtéz.
20                    Ses ennemis requiert crueusement.
                        Il ayme Dieu, justice et povre gent.
                        De son peuple est fort amé et chery.
                        Nulz ne se puet comparer deu[e]ment
                        Aux grans vertus de mon loyal amy.

                        L’envoy

25                    Prince, pou fu d’Olivier et Rolant
                        Ne des .ix. preux au regart de cestuy.
                        Il n’a pareil dessoubz le firmament
                        Aux grans vertus de mon loyal amy.

[1] Saint Hilaire corrige en corps

[2] Saint Hilaire corrige en s’est