Balade 321 : Je ne desir avoir or ne richesce (CCCCXXXI)

Balade

                        Je ne desir avoir or ne richesce,
                        Seigneurie, terre ne royaulté,
                        Puissance, sens, renommee, prouesce,
                        Force de corps, ne nulle dignité,
5                      Grace des genz, lignage ne biauté,
                        Ne riens qui soit en ceste mortel vie,
                        Fors que sanz plus vir a ma voulenté
                        La fleur des fleurs, c’est ma dame et m’amie :

                        Car elle a tous, comme fleur de jeunesce,
10                    Les biens mondains, grace et humilité,
                        Honnour, doulçour, souveraine largesce,                                         146c
                        Toutes vertus avec toute bonté,
                        Honte, Paour, ont si son cuer dompté
                        Qu’en son penser n’entra oncques folie.
15                    Mais de tous biens a toutes surmonté
                        La fleur des fleurs, c’est ma dame et m’amie.

                        Or est si loing que jour n’ay de leesce,
                        Ne tous mes biens ne sont que povreté
                        Quant ne la voy, c’est ce qui trop me blasce
20                    Et que me fait vivre en adversité.
                        Pour ce supply a Grace et a Pité,
                        Que, pour tous biens, je puisse a chiere lie
                        Veoir briefment, ou je suy deserté,
                        La fleur des fleurs, c’est ma dame et m’amie.

                        L’envoy

25                    Prince d’Amours, dieu[e]sse d’amité,
                        A nulz genoulz, jointes mains vous supplie
                        Que brief voye, par vostre affinité,
                        La fleur des fleurs, c’est ma dame et m’amie.