Balade 320 : C’est grant pité de terre grasse et bonne (CCCCXXX)

Autre Balade

                        C’est grant pité de terre grasse et bonne,
                        Quant on la laist a riés[1] ou a savart.
                        Car la bonté d’elle trestout bien donne
                        Et fait fenir, mais s’on labeure tart
5                      Le fruit ne puet avoir si bon regart                                                   146b
                        Pour la terre, quant elle est desortee,
                        Comme celle qui en bon temps s’espart :
                        Ainsi est il de vous, doulce rousee.

                        Car vous portéz de jeunesce couronne,
10                    Bonne et belle, qui d’onneur savéz l’art.
                        Si me merveille quant je [ne] voy personne
                        Ou vous vueilléz avoir aucune part.
                        Demourréz vous toudis en tel essart
                        Sanz laissier hoir dont soiéz renommee ?
15                    L’arbre brehain par secheresse [on] art :
                        Ainsi est il de vous, doulce rousee.

                        Or vueillés donc, si com Jeunesce ordonne,
                        Que par honneur vous ayéz le depart
                        Du doulx labour qui a bien s’abandonne
20                    Pour faire fruit, et que le temps se gart
                        De reffuser le doulz amoureux art
                        Par lequel vous et toute dame est nee.
                        Plusieurs l’ont fait, folie leur depart :
                        Ainsi est il de vous, doulce rousee.

[1] Ms. tiegz