Balade 319 : On dit que le monde est mauvais (CCCCXXVIII)
Balade
On dit que le monde est mauvais 145d
Et qu’il empire chascun jour
Et que bon ne sera jamais
Et que nulz ne quiert plus honnour.
5 Li freres honnist la serour
Et le fils deçoit bien son pere,
Et le grant destruit le menour :
Qui mal fera si le compere.
On ne voit que guerre sans paix,
10 Toute joye est tournee en plour.
Questions [sont], procés et plais
Et la terre est de grief labour.
Droit fault, justice va au tour
Des mauvais, et d’iceulz se pere
15 Sanz pugnir, c’est grant deshonnour :
Qui mal fera si le compere.
Et quant chascun sent ses meffais
Que ne delaisse il sa folour ?
Par nous est li mondes si fais
20 Non pas par lui, c’est grant horrour.
Or corrigons[1] donc nostre errour
Qui appert evident et clere.
Amons nous tuit de vray amour :
Qui mal fera si le compere.
L’envoy
25 Prince, au jour d’uy n’a nulz tenrour
Fors sur soy, c’est parole amere.
Charité fault, grace et doulçour :
Qui mal fera si le compere.
[1] Saint Hilaire corrige en corrigeons
