Balade 317 : Tant m’ont prié et requise d’amours (CCCCXXVI)

Autre Balade

                        Tant m’ont prié et requise d’amours
                        Maint jouvencel et homme de parage,
                        En poursuiant et de nuit et de jours,
                        Sanz ce qu’oir voulsisse leur langaige,
5                      Que gardee me suy de leur oultrage
                        Jusques a cy que j’ay esté surprise
                        De l’un d’iceulx au bout d’une jardinage.
                        Par les courtieux fu Anthioche prise.

                        Il me happa par derrier, a rebours.
10                    Sanz lui veoir m’embla mon pucelage,
                        Et entra ens par derrier les haulx bours,
                        Car par devant n’eust ja pris le village.
                        Guaite y avoit bonne, vaillant et saige
                        Pour rebouter sa mauvaise entreprise.
15                    Honnie suy, lasse ! Pour ce diray je :
                        Par les courtieux fu Anthioche prise.

                        Si ay je esté : mais trop me fist de tours
                        Cilz qui me prist : yert repeux en l’erbage.
                        Pour la chaleur je mis jus mes atours
20                    Et me cuiday baigner sur un rivage,
                        Quant il sailly tous seulz en tapinage
                        Et par derrier me prist par ma chemise.
                        Je cheus adens. La me fist moult de rage :
                        Par les courtieux fu Anthioche prise.

                        L’envoy

25                    Prince, il n’es tour de si fort maçonnage
                        Qui par derrier ne puist bien estre assise.
                        Si n’yray plus seulete au courtillage :
                        Par les courtieux fu Anthioche prise.