Balade 316 : Secoure moy ! ― De quoy ? ― Des maulx d’amer (CCCCXXV)

Balade

                        Secoure moy ! ― De quoy ? ― Des maulx d’amer.
                        ― Et quelz snt il ? ― Ilz passent toute rage,
                        Ilz sont ardans, ilz font coulour muer,
                        Ilz font un fol estre d’un homme saige,
5                      Ilz font trembler et paier le musaige,
                        Aler, venir, penser et pou dormir,
                        Cent fois le jour tourmenter le couraige.
                        ― Dont sont ce[1] maulx que nul ne puet guerir.

                        ― Si fait. ― Comment ? ― Par doulx confort d’amer.
10                    ― De qui ? ― De vous, tresbelle et doulce ymaige.
                        ― Par quel moyen. ― De baisier, d’acoler
                        Et de souffrir au doulx pelerinaige
                        Offrir celui qui s’i veue et enraige
                        Quant il ne puet d’amours a chief venir.
15                    ― C’est trop avant et requis a oultrage.
                        ― Dont sont ce[2] maulx que nul ne piet guerir.

                        ― Chascun requiert ce qui le puet sauver.
                        ― C’est voir, dame, et pour ce vous priai je.
                        ― Ne souffist il de toy espoir donner
20                    Tant seulement ? ― Non, c’est pou d’avantaige :
                        Touchier le lieu d’amours et le voiage
                        Par doulx espoir puet ma langour fenir.
                        ― Languir te fault. ― Helas ! pour ce diray je :
                        Dont sont ce[3] maulx que nul ne puet guerir.

                        L’envoy

25                    Princes d’Amours, faites les maulx muer.
                        ― De qui ? ― D’Amours, qui doit amant merir,
                        Ou je diray tout au desesperer :
                        Dont sont ce[4] maulx que nul ne puet guerir.

[1] Ms. ces.

[2] Ms. ces.

[3] Ms. ces.

[4] Ms. ces.