Balade 315 : Bon fait savoir la maison de leesce (CCCCXXIV)

Autre Balade

                        Bon fait savoir la maison de leesce
                        Ou toute honneur et toute joie maint
                        Par la doulçour de ma dame, deesce
                        Qui de biauté embelist tout l’ensaint,
5                      C’est Paradis. Lors n’est sainte ne saint
                        Qui me feist estre gay ne joyeux
                        Quant departir me fault de voz doulz yeux.

                        De tel maison fait bon suir l’adresce.
                        Estre n’y puis, dont mon las cuer se plaint,
10                    Pour mesdisans. Ce n’est pas par peresce.
                        Or y seront au jour d’uy mainte et maint
                        Joye menans, et je feray mon plaint,
                        Comme celui qui bien n’a, ce scet Dieux,
                        Quant departir me fault de voz doulz yeux.

15                    Mais s’il plaisoit a ma doulce maistresse
                        Que de moy feust le souvenir empaint
                        En son doulx cuer a ce jour de noblesce,
                        Mon grief penser seroit auques destaint,
                        Car son grant bien toute ma langour vaint.
20                    Mais trop souvent suy merencolieux
                        Quant departir me fault de voz doulx yeux.