Balade 314 : Fontayne suy dont le ruissiau de plour (CCCCXXIII)

Balade

                        Fontayne suy dont le ruissiau de plour
                        A ma vie Mort dolente arousee,
                        Qui tollu m’a la plus belle et meillour
                        Qui oncques feust et jamais sera nee,
5                      Jeune et gentil, la mieulx endoctrinnee
                        En trestous cas que l’en peust trouver,
                        Plaisant a tous et de chascun amee :
                        Pour ce la vueil a tousjours mais plorer.

                        Convertir vueil ma leesce en tristour,
10                    De vert en noir yert ma coulour muee,
                        Et mes repos seront en grief labour,
                        Mes souvenirs en vie desperee[1].
                        O les plorans sera ma destinee,
                        Et la me fault mon chetif temps user,
15                    Quant j’ay perdu m’amour et ma pensee.
                        Pour ce la vueil a tousjours mais plorer.

                        S’arouseray[2] desormais en destour
                        De mes larmes la chetive contree
                        Des dolens cuers qui perdent leur amour,
20                    Comme j’ay fait par toy, faulse prouvee,
                        Tant que, moy mort, mon ame ait recouvree                                   144d
                        Celle qui fait ma vie enlangourer
                        Par son grant bien et sa grant renommee :
                        Pour ce la vueil a tousjours mais plorer.

[1] Ms. desesperee

[2] Saint Hilaire corrige en J’arouseray