Balade 313 : Servans d’Amours ay tout mon temps esté (CCCCXXII)

Autre Balade

                        Servans d’Amours ay tout mon temps esté,
                        Chantans, danssans, joustans jusques a cy,
                        Liéz et joyeux, gay, jolis, conforté,
                        Tout m’aloit bien, car j’ay eu nom d’amy.
5                      Riens ne me fault, fors que j’ay doubte en my
                        Qu’il ne faille mon corps perdre la vie
                        Se Loyaulté me veult estre ennemie.

                        Mais j’ay espoir, puisque j’ay bien amé
                        Et loyalment a ma dame servy,
10                    Qu’Amour jamais, raison, doulce pité
                        Ne soufferroit que je feusse trahy.
                        Povre guerdon me seroit remer                                                         144c
                        De bien amer, si ne m’en loueray mie,
                        Se loyauté me veult estre ennemie.

15                    J’aroie trop en vain mon temps usé.
                        Pour ce a ce coup saray s’il est ainsi.
                        Mieulx me vauldroit je n’eusse onc esté né.
                        Car s’ainsi est, Amours du tout reny,
                        Joye, deduit, le bon temps que je vy.
20                    Tristesce aray et Amour villenie,
                        Se loyauté me veult estre ennemie.