Balade 312 : Se la bonté, la vaillance et l’onnour (CCCCXXI)

Autre Balade

                        Se la bonté, la vaillance et l’onnour,
                        Le bien, le senz et nom que vous avéz
                        Ne me secourt par pité et doulçour
                        Et n’est pour moy au lieu que vous savéz,                                       144b
5                      Estre ne puis de mes maulx confortéz.
                        Mais s’il vous plaist, a honneur seray mis :
                        Or me soiéz vray sires et amis.

                        Car ma vie est, mon desir, mon labour,
                        En celle ou plus que nulle autre pouéz,
10                    Qui de bonté, de sens estes la flour,
                        Et qui plus est vous lui appartenéz.
                        Si vouldroie de telle heure estre nez
                        Que par vous feust mon cuer au sien unis :
                        Or me soiés vray sires et amis.

15                    Car par ma foy je ne quier autre amour
                        Pour vivre en paix, estre bien assenéz
                        Pour vous servir, et estre nuit et jour
                        En vo commant. Et ainsi honnoréz
                        Seroie fort, se j’estoie claméz
20                    Vostre parent. Pour ce humblement vous dis :
                        Or me soiéz vray sires et amis.