Balade 311 : En lieu de may que pluseurs vont cueillir (CCCCXX)

Autre Balade

                        En lieu de may que pluseurs vont cueillir
                        Ce premier jour de ce May gracieux,
                        Et a Amours cuer et penser offrir,
                        Me fault aler cercher lieux tenebreux
5                      Et es desers plaindre et gemir tous seulx,
                        Querir le sec comme la turterelle,
                        Puis qu’elle pert son doulz par amoureux,
                        Quant j’ay perdu ma dame bonne et belle                                       144a

                        Par faulx rapport qui m’a voulu trahir
10                    Et sanz raison me rent souspeçonneux.
                        Hé ! mesdisans, que je vous doy hair,
                        Le croire tost et tous les envieux
                        Qui ce m’ont fait ! puissent perdre les yeux
                        Si vraiement que j’ay juste querelle
15                    De mener dueil et d’estre douloureux,
                        Quant j’ay perdu ma dame bonne et belle !

                        Pour ce ne doy ne vueil joye sentir,
                        N’aler en lieu ou nulz homs soit joyeux,
                        Ainçoiz pour vert me vueil de noir vestir.
20                    A tousjours mais feray mes plaings piteux,
                        Et es desers demourray comme uns leux
                        Doresnavant[1], se pitié ne m’apelle.
                        La fineray tristes et langoureux,
                        Quant j’ay perdu ma dame bonne et belle

                        L’envoy

25                    Prince d’Amours, je ne fais que languir.
                        De jour en jour mon dueil se renouvelle.
                        Ou desert vois pour ce d’amours mourir
                        Quant j’ay perdu ma dame bonne et belle.

[1] Ms. Doresenavant