Balade 310 : Sur tout les mois, qui sont .xii. nomméz (CCCCXIX)

Autre Balade

                        Sur tout les mois, qui sont .xii. nomméz,
                        Qui trois et trois font les .iiii. saisons,
                        Dont li temps est et li ans renomméz,
                        Soit li doulx May honnoréz, c’est raisons,
5                      Qui reverdist prez, arbres et buissons,
                        Jardins et boys, et fait les fleurs venir.
                        Au dieu d’amours ce jour sacrifions,
                        A tous amans en doit bien souvenir !

                        Cilz premiers jours de May doit estre améz :
10                    Vestus de vert, amoureux, le querons
                        En ces biaux boys. Soit[1] de nous honnoréz :                                     143d
                        Cuer et penser, et li bien lui offrons
                        Pour noz amours, humblement lui prions
                        Que chascun face en droit soy retenir
15                    A ce saint jour ou mercy esperons :
                        A tous amans en doit bien souvenir.

                        Car a ce jour doit estre acoustuméz
                        De recevoir complaintes et chançons.
                        Que les durs cuers soient en doulx muéz,
20                    Et que pitéz vueille secourre au bons.
                        Dangier, Desdaing et Reffus li felons
                        Soient chasséz sans jamais revenir.
                        De noz amours se tel octroy avons,
                        A tous amans en devroit souvenir.

                        L’envoy

25                    Prince des mois et[2] sur tous couronnéz,
                        De vrays amans octroyéz le desir.
                        S’ainsi faittes que faire le devéz,
                        A tous amans en doit bien souvenir.

[1] Ms. sont

[2] Ms. est