Balade 308 : Belle, blanche, blonde, bonne, agreable (CCCCXVII)

Balade

                        Belle, blanche, blonde, bonne, agreable,
                        Jeune et gente, de tous bien aournee,
                        Saige en voz fais, treshumble et honnorable,
                        De chascun est vo maniere loee,
5                      Vostre bon nom va en mainte contree,
                        Pour vo grant bien vous desire tout[1] homme
                        Veoir souvent, jugans par renommee
                        Telle dame estre emper[e]is de Romme.

                        Car vous avéz la maniere acointable,                                                143b
10                    Doulce et plaisant, qui pas ne se desree,
                        A gens d’onneur la parole amiable,
                        Et aux moyens maniere entremellee.
                        Riens ne faictes qui aux povres n’agree,
                        Vostre humble voult les orguilleux consomme.
15                    Tous souhaident, tant estes bien amee,
                        Telle dame estre empereis de Romme.

                        Mais vo pitié est plus que piteable,
                        Et vo bonté est plus que bieneuree,
                        Et vo biauté plus que biauté louable,
20                    Quant grace avec si parfaicte et si lee
                        Que chascun dit c’onq meilleur ne fu nee
                        Depuis le temps qu’Eve mort en la pomme.
                        Pour ce de tous est sentence donnee
                        Telle dame estre empereis de Romme.

                        L’envoy

25                    Prince, moult doit Nature estre honnoree
                        Qui celle fist que tout li mont renomme.
                        Non de fleur a, et pour ce est desiree
                        Telle dame estre empereis de Romme.

[1] Ms. tant