Balade 307 : A quelle heure fu nez le corps de my (CCCCXVI)

Autre Balade

                        A quelle heure fu nez le corps de my,
                        Qui ay aymé tout le temps de ma vie
                        Tresloyalment, mais oncques nom d’amy
                        Ne pos avoir ? n’encor ne sueffre mie
5                      Celle que j’aym que je l’appelle amie,
                        Et autres voy qui font de fivers tours,
                        Qui sont améz. Est ce chose jugie,
                        C’onques ne poy avoir grace d’Amours ?

                        Et si l’ay je puis .xiiii. ans servy
10                    De cuer, de corps, comme serf qui supplie,
                        En esperant de ma dame mercy,
                        Sanz mal penser et sanz dire folie
                        Et encor fais, mais point ne s’amolie
                        Pour ce son cuer, mon fait va a rebours.                                          143a
15                    Je fus conceups en dolente nuytie,
                        C’onques ne poy avoir grace d’Amours !

                        De jour en jour ses tresdoulz biens escry,
                        En pluseurs cas y ay mis m’estudie.
                        En mes libres monstré l’onneur de ly,
20                    De qui souloit venir chevalerie,
                        Et vient encor, mais trop fort se varie,
                        Puisqu’aux bons cuers ne veult faire secours.
                        Pour ce a bien pou que l’amer ne renye
                        C’onques ne poy avoir grace d’Amours.

                        L’envoy[1]

25                    Prince, je suy d’amer en escargie,
                        Triste, pensis, dolens, muyaux et sours.
                        Mourir me fault de ceste maladie
                        C’oncques ne poy avoir grace d’Amours.

[1] Ms. Autre Balade