Balade 306 : Je ne voy pas au jour d’uy cueillir may (CCCCXV)

Autre Balade

                        Je ne voy pas au jour d’uy cueillir may,
                        Vestir le vert, n’aler sur la verdure.
                        Pourquoy ? Pour ce que nulle joye n’ay,
                        Quant loing me voy de la doulce figure
5                      Qui ne scet pas les griefz maulx que j’endure,
                        Et com je l’aym de tresloyal amour.
                        Joye me fuit, qui m’est chose moult dure :
                        Sur l’arbre sec vueil faire mon demour.

                        Car je n’ose dire, dont je m’esmay,
10                    A ma dame ma douleur qui trop dure,
                        Ne les pensers qu’a son tresdoulz corps ay,                                    142d
                        Car de mourir seroye en aventure
                        Si le desdaing la faisoit estre dure :
                        De ma vie n’aroye nul retour.
15                    Pour ce languy et suy en aventure :
                        Sur l’arbre sec vueil faire mon demour.

                        La tout mon temps ma demeure feray,
                        Puisque je n’ay ma doulce nourriture.
                        De noir et gris toudis vestu seray,
20                    N’autre qu’elle ne m’ara ja en cure.
                        La gemiray la biauté de nature,
                        Contre ma mort feray un chant de plour
                        Com le signe, pour ma desconfiture :
                        Sur l’arbre sec vueil faire mon demour.