Balade 305 : Oncques nulz homs n’ot d’amours plus de paine (CCCCXIV)
Autre Balade
Oncques nulz homs n’ot d’amours plus de paine
Que je sueffre pour amer loyalment,
Ne tant n’ayma sa dame souveraine
Comme je l’aym de cuer parfaitement.
5 Toudis la sers, mais je ne say comment
Elle a vers moy si merveilleuse guise :
Quant plus me voit ma dame et moins me prise.
De l’onnorer et du servir me payne
De cuer, de corps, de tout mon pensement,
10 N’autre n’aour. Com deesce mondaine
Vueil obeir a son commandement,
N’a nul autre n’ay mon entendement.
Mais je ne say qui en tel ploy l’a mise :
Quant plus me voit ma dame et moins me prise. 142c
15 Dont de douleur le cuer me frist et saigne,
Car plus la voy et plus ay de tourment,
Quant j’aperçoy que veoir ne me daigne
Fors que devoste et trop estrangement.
Je muir de dueil, car je voy clerement
20 Que contre moy vente le vent de bise :
Quant plus me voy ma dame et moins me prise.
L’envoy
Prince, je vif trop douloureusement.
Ou[1] peut avoir ceste maniere aprise
Celle que j’aym si amoureusement ?
25 Quant plus me voit ma dame et moins me prise.
[1] Ms. On
