Balade 304 : Plus a de mal en armes qu’en amours (CCCCXIII)
Autre Balade
Plus a de mal en armes qu’en amours[1] 142a
Et plus de griefz, ce soustient Tymonville.
C’om est armé et de nuit et de jours,
Au froit, au vent, gisans hors de la ville,
5 On est moulléz quant il pleut et gresille,
Et si fait on le guet en cest estat,
Et plusieurs foiz maint homme s’i combat
Et est navréz d’espees ou guisarmes,
On muert de fain. C’est dit d’un[2] homme mat :
10 Plus a griefs en amours que en armes.
Qu’a ce mestier se sousmettent plusours
De leur vouloir, et si ont fait cent mille,
Tant pour avoir comme pour querir honnours,
Si n’en sont pas leurs meschiefz si penille,
15 Quant leur vouloir est a ce faire habile
Sanz contrainte, qui franc arbitre bat.
Mais Amours fiert et d’estoc et de plat
Maint dolent cuer qui pleure a chaudes larmes[3]
Oultre son gré. si dy comme advocat.
20 Plus a de griefz en amours que en armes.
Car Doulz Regart trait et perce le corps
Jusques au cuer, et par voie subtille
Bel Acueil fiert. Par decoste a rebours
Desir assault et Biau Maintien s’abille.
25 Et Dangier vient pour deffendre la fille.
Honte et Paour mennent la grant debat,
Espoir s’enfuit. Est ce cy grant combat[4] ?
Certes nennil, c’est un piteux wacarmes,
Quant on n’en puet avoir seur estat :
30 Plus a de griefz en amours que en armes.
L’envoy 142b
Princes royaulx, qui congnoissiéz les tours
Des amoureux, des guerres, des estours,
Leurs grant pouoir, leur attrait et leurs charmes,
Consideréz de chascun les clamours.
35 Lors jugeréz, se vous n’estes trop sours :
Plus a de griefz en amours que en armes.
[1] Ms. armours
[2] s. um
[3] Ms. lermes
[4] Ms. debat
