Balade 302 : Pour mon desir plus fort renouveller (CCCCXII)

Balade

                        Pour mon desir plus fort renouveller
                        Qui chascun jour en moy se renouvelle,
                        Vous vueil mon corps et ma vie ordener
                        A ce bon jour, ma dame bonne et belle.                                           141d
5                      Recevéz lay ceste annee nouvelle,
                        Et se le don n’est fait nouvellement
                        Par doulz octroy, vauldra mieulx ma querelle
                        A ce bon jour de renouvellement.

                        Je ne vous say d’autre chose estrener.
10                    Mais au jour d’uy dame ne damoiselle
                        Ne me pourroit sanz vous confort donner,
                        Qui de doulçour estes la vraye estoille.
                        Tant suy ferus d’amoureuse estincelle
                        Que ja guerir n’en pourray nullement
15                    Se vo pitié ma doulour ne rappelle
                        A ce bon jour de renouvellement.

                        Or me vueillés, chiere dame, appeler,
                        Ainsi qu’Amour son vray amant appelle,
                        Amy parfait, qui ne saroit aler
20                    Hors du chemin de sa doulce santelle,
                        Car de paour tout le cuer me sautelle
                        Se de vous n’ay grace et allegement.
                        Grace requier, soit donc pité en elle
                        A ce bon jour de renouvellement.

                        L’envoy

25                    Tresdoulce flour, humble com coulombelle
                        Et plus ferme que n’est le dyament,
                        Recevéz moy, loial com turterelle,
                        A ce bon jour de renouvellement.