Balade 297 : On dit qui veult asséz sçavoir (CCCI)
Balade de ceuls qui vont a la court pour sçavoir et aprandre honour
On dit qui veult asséz sçavoir,
Et aprandre toutes honnours,
Pour acquerir sens et avoir,
Qu’il doit traire devers les cours
5 Et qu’il ne sera ja si lours,
S’il y frequente longuement,
Qu’il n’ait sens et entendement,
Et que sa maniere ne change :
C’est vray, mais c’est estrangement :
10 Toudis font gens de court l’estrange.
Car telz y vient plains de sçavoir,
Et en la grace de plusours,
Qu’outrecuidier fait decepvoir,
Quant il voit un po ses atours.
15 Et lors lui brass’on de telz tours 66d
Que grace y pert legierement :
S’il dit voir au venir, il ment.
Si tost qu’il vient a court, se change.
Fiéz vous y. Fy ! voirement
20 Toudis font gens de court l’estrange.
L’un vers l’autre fait son devoir,
Ilz s’aiment, comment ? ― Arrebours,
Et le sçavéz vous bien de voir.
― Oïl certes, car touz les jours
25 Les voy bras a bras et le cours
En derrier se vont diffamant
Et leur amour dissimulant
En traison : ainsis l’enten je.
Les bras au coul se vont noyant :
30 Toudis font gens de court l’estrange.
L’envoy
Prince, dont vient ce mouvement ?
D’Envie qui fait ce tourment.
A court ne puet souffrir louenge
Qui s’en part : au retournement
35 Lui fault nouvel racointement :
Toudis font gens de court l’estrange.
