Balade 296 : Conseilliéz moi. ― De quoi ? ― D’avoir chevance (CCC)
Autre Balade
Conseilliéz moi. ― De quoi ? ― D’avoir chevance,
Et des .vii. ars lequel puet plus valoir
Pour le present, et tost avoir finance.
― Tresvoluntiers : je te faiz assavoir
5 Qu’Arismetique est de moult grant pouoir.
Tous les .vii. ars en puissance surmonte :
Elle enrrichist, elle giette, elle compte,
Finance fait venir de mainte gent.
Nulz n’a estat se bien ne scet que monte
10 Compter, getter et mannier argent.
Gramaire est rien. Logique ne s’avance.
Rethorique ne puet richesce avoir.
Astronomi n’ont estat ne puissance.
Geometrie se fait pou apparoir,
15 Et Musique n’a au jour d’hui vray hoir.
De ces .vi. ars aprandre a chascun honte.
Mais qui assiet sur finance et remonte,
Qui scet doubler et tierçoier souvent
C’est le meilleur : apran ton cuer et dompte 66c
20 Compter, getter et mannier argent.
Qui tel art scet avant se boute et lance.
Entre les Roys gouvernent main et soir
Les receveurs, tresoriers que d’enfance
A l’en veu a maint change seoir,
25 Les monnoiers : ceuls la puet l’en veoir
Es grans estas, ainsi que je te compte,
Qui gouvernent maint Roy, maint duc, maint comte,
Dont mains pais est povre et indigent
Pour les vaillans que ce regrain ahonte :
30 Compter, getter et mannier argent.
L’envoy
Beaus fieulx, au fort maint d’eulx se desavance
Ou par Orgueil ou par Oultrecuidance,
Ou par gaingnier trop excessivement.
Pran le moien, gouverne a la balance,
35 Car cheoir puet par sa desordonnace
Compter, getter et mannier argent.
