Balade 295 : Un jardinier qui un jardin avoit (CCXCIX)
Autre Balade
Un jardinier qui un jardin avoit
Si grant, si bel, si doulz, si odourant,
D’arbres si bons, d’erbes, qu’om ne sçavoit
Que de tous fruis et de flours n’y eust plant.
5 Mais li chetis par folie fist tant
Que les antres et bon plant arracha,
Ronces y mist et de l’yerre y planta
Qui aux jardin et flourettes ont nuit,
Si qu’en brief temps tout bon arbre y seicha :
10 Qui chetif plant eslieve, il se destruit.
Et quant li las ainsi son jardin voit,
De sa folour, mais a tart, se repent.
Les espines chascun jour arreschoit,
Mais d’orties et ronces y a tant,
15 Cauppetrapes et l’ierre qui pourprant
Qu’a l’essarber sa chevance gasta,
Et son jardin puis ne fructifia,
Ne plant n’y ot qui peust porter bon fruit.
Ainsi jardin et jardinier fina :
20 Qui chetif plant eslieve, il se destruit.
Tel figure ramener qui voulroit
Pourroit asséz a moralité grant
De maintseignieur, qui ainsi se deçoit 66b
Par eslever le chetif nonsaichant
25 Et le planter, esrachier le sachant,
Et ainsi pert tout ce qui l’onoura.
Et au derrain l’un l’autre destruira.
Or advisent a ce toutes et tuit,
Et pour certain chascuns veoir pourra.
30 Qui chetif plant eslieve, il se destruit.
L’envoy
Princes, le plant qui bon fruit portera
De viel estoc, cilz vous proufitera.
Antéz cellui et de jour et de nuit.
Du plant villain d’espine qui poindra
35 Ne d’ortie branche ne plantéz ja :
Qui chetif plant eslieve, il se destruit.
