Balade 294 : Tu qui veulz aler par pais (CCXCVIII)
Balade qui dit que tout homme qui va parmi le monde doit avoir en lui.vi. bonnes condicions
Tu qui veulz aler par pais,
Six choses te vueil enseignier :
Ne te debat pour ton logeis
S’on te veult a couvert logier.
5 Et quant ce vendra au couchier
Et ailleurs, offre toy le mendre :
Fay les autres choisir et prandre[1].
Soies courtois et gracieus,
Et sur toutes choses doiz tendre
10 D’eschiver homme rumoreus,
Que tu ne le soies aussis.
Doubte Dieu. Sobresse en mangier
Doiz avoir. Ne soies sousprins.
De vin. Ne parle de legier.
15 Gieu de dez te fault estrangier.
Mal de nul ne vueilles reprandre.
A honour doiz sur tout entendre,
Sanz mentir n’estre paresceus.
Et dois retenir et aprandre
20 D’eschiver homme rumoreus.
Car il y a tant de perilz
Que nulz ne les sçaroit jugier :
Pour faire entretuer amis,
Pour perdre honour, pour eslongier
25 Toute amour. Et si doiz paier
A tes hostes, sanz trop reprandre
Leur vouloir. Tu te doiz estendre 66a
Une fois pour avoir gre d’eulx :
N’y revien plus. Vueilles emprandre
30 D’eschiver homme rumoreux.
L’envoy
Vous qui aléz, aiéz advis
Sur ces poins que j’ay dessus mis :
Servéz chascun. Soiéz joieux.
En voz bouches n’ait que beaus dis,
35 Et soiéz adviséz toudis
D’eschiver homme rumoreux.
[1] Ms. aprandre
