Balade 293 : Qu’est devenu le temps ou je cuiday (CCXCVII)
Balade comment l’aage vieil congnoist sa fole jeunesce et oultrecuidance
Qu’est devenu le temps ou je cuiday ?
Quant je me vi en l’aage de vint ans,
Que mes cheveulx et mon corps regarday,
Bien me sembloit que je fusse Rolans,
5 Saiges sur tous, et, comme oiseauls volans,
Fors et appers, convoiteus de vouloir
Tout assovir, et plus que mon pouoir.
Ne me sembloit qu’il fust homme en ce monde
Qui me vausist de sens et de pouoir :
10 Pour ce est trop foulz qui en cuidier se fonde.
De tout cerchier en ce temps m’efforçay.
Je fus hastis, chaux et entreprenans,
Jolis sur tous. Trop me desmesuray.
En mains perilz fu maintefois manans.
15 Folie amay, je fis tous ses commans.
Celle me fist mainte grant honte avoir,
Batre et tancier, perdre de mon avoir,
Et par .xvi. ans me plunga en celle onde
Ce foul cuidier qui me voult decepvoir :
20 Pour ce est trop foulz qui en cuidier se fonde
A .xl. ans depuis ce me trouvay
Nices et foulz, chetis, povres, dolens.
Tous esbahis de mon cuidier plouray
Et commençay lors a estre acquerans,
25 Mais ce fut tart. Or vis que je fus blans
Et que ma mort desirent ja mi hoir.
Tuit li cuideur, faictes de moy miroir,
Car froit et mort en ma viellesce habonde :
Le temps s’en va sanz cuidier remanoir,
30 Pour ce est trop foulz qui en cuidier se fonde,
L’envoy
Prince, monstréz a ces jeunes enfans 65d
Que leurs cuidiers ne les soit decevans,
Car tost verront de viellesce la bonde
Et mort, qui fiert les petiz et les grans.
35 De mes cuidiers n’ay qui vaille .ii. gans,
Pour ce est trop foulz qui en cuidier se fonde.
