Balade 292 : Se ceuls qui ont seignourie a garder (CCXCVI)
Balade comment tous roys et princes se doivent faire doubter et obeir en tous cas[1]
Se ceuls qui ont seignourie a garder
Sçavoient bien que c’est d’obeissance,
Et comment Roys se doit faire doubter
Et en tous cas tenir son ordonnance,
5 L’en pugniroit tant desobeissance
Qu’a tousjours mais en seroit mencion.
Car obeir fait dominacion.
Desobeir seignourie destruit 65b
Et maint pais en sont de seigneur vuit,
10 Qui des subgiéz n’ont rebouté tel vice :
Or y pensent seigneurs, dames et tuit :
Durer ne puet royaume sanz justice.
Mais au jour d’ui, qui bien veult regarder
Ceuls que princes lieve hault et avance,
15 En pluseurs lieux ceuls verréz regiber
Contre son droit, faire grant desplaisance
A ses subgiéz, appliquer par puissance
Ce qui leur nest par leur presumpcion.
Par tel seigneur sont en elaction.
20 S’un justicier en parle, trop luy nuit.
Lors pert princessont demaine qui fuit[2],
Par son deffault son souverain office,
Quant ne soustient ce qui sont droit conduit :
Durer ne puet royaume sanz justice.
25 Pour ce sur touz doivent prince dampner
Ceuls qu’ilz ont faiz, qui, soubz grace et fiance
De leur amour, veulent leurs gens fouler,
Leur droit tolir, exurper leur chevance.
Ingrades sont, et ceste decepvance
30 Ne doit avoir nulle remission.
En ce cas soit faicte pugnicion,
Tant qu’a telz maulx ne soit nul homme instruit,
Car eschaudés craint eaue jour et nuit.
Si fait mauvés, s’il est qui le pugnice,
35 Paine et tourment : aviséz cy trestuit.
Durer ne puet royaume sanz justice.
L’envoy
Princes, qui veult selon les lois regner,
Il doit les bons sur toute chose amer,
Et aux mauvais, felons, plains de malice
40 Pugnicion en publique donner,
Ou autrement se voit desheriter.
Durer ne puet Royaume sanz justice. 65c
[1] Pièce identique au f° 264 sous le numéro MVI.
[2] Ms. finit
