Balade 291 : Au requerant estat ne benefice (CCXCV)
Balade comment on doit donner les offices et a quelz gens
Au requerant estat ne benefice,
Qui convoiteus quiert sa promocion,
Ne doit nulz homs bailler charge n’office,
Car il ne tent fors a decepcïon,
5 Soy enrichir, et en conclusïon
Monter plus hault de degré en degré.
Saiges preudoms ne demande nul gré :
Le bien commun lui souffist et science,
Et pour ce fait bon prandre a son secré
10 Povre, riche, saige et de conscience.
Riche, comment ? ― Qui fuit toute avarice, 65a
Et lui souffist povre possessïon,
Qui vertus a et eschive tout vice,
Qui het estat et toute ambicïon :
15 Office avoir doit par electïon,
Sanz requerir, homme ainsis ordonné.
A telz gens soit gouvernement donné
Que l’en congnoist par longue experience,
Car bon avoir fait cuer moriginé,
20 Povre, riche, saige et de conscience.
Mais au jour d’ui voy de tous biens esclipse,
Tant au secle comme en religïon,
Car es estas sont promeu li nice
Et li enfant par adulacïon[1].
25 Pour ce va tout a desolacïon,
Le bien commun, l’Eglise et la princé.
Qui eust pieça a ces poins advisé,
Et des vaillans saiges fait aliance,
Tout grant seigneur eust pour bien approuvé
30 Povre riche, saige et de conscience.
L’envoy
Prince, je voy que tout est desolé
Pour ce qu’om n’a des saiges congnoissance,
Et pis vendra, jusqu’en ait recouvré
Povre, riche, saige et de conscience.
[1] Ms. aduzalation
