Balade 290 : Empereurs, Roys et tous princes de terre (CCXCIV)
Balade quelz gens uns princes doit avoir et comment il se doit garder
Empereurs, Roys et tous princes de terre,
Aviséz bien vostre gouvernement,
Qui peuple aveéz, justice a faire ou guerre :
De voulenté n’uséz ne chaudement
5 Contre raison. Servéz devotement
Et doubtéz Dieu, et lors vous aidera.
Creéz conseil, qui bon le vous donrra,
Des anciens, car Salemon le sonne
Par Roboam qui les vielz despita.
10 Mais en tous lieux gardéz vostre personne.
Faictes les bons, saiges et vaillans querre
Pour vous servir. Ceuls améz chierement
En leurs estas : par eulx pourréz acquerre
Sens et honeur, prouesce et hardement.
15 Selon leurs faiz les louéz grandement, 64d
Chascuns josnes lors exemple y prandra,
Ly mauvais, bien li bons amendera.
Saiges est Roys qui tel exemple donne
A ses subgiéz, ne sçay qu’il en sera.
20 Mais en tous lieux gardéz vostre personne.
Car vous n’avéz tous c’un cop ne c’un voirre.
Si vous devéz garder diligenment,
En voz hostelz, ou maint ennemi erre,
Et par dehors chevauchier seurement,
25 Acompaigniéz bien et notablement
Des chevaliers. foulz est qui seulz yra.
Maint en perist et maint en perira.
Roys folement jamais ne s’abandonne.
Tenéz vous clos et chascun vous craindra.
30 Mais en tous lieux gardéz vostre personne.
L’envoy
Prince et tout Roy qui gouvernement a
Pour jonesce ne doit bouter en la
Le sens des vieulz, qui en tous temps foisonne,
Sanz lesquelz nul bien ne gouvernera.
35 Or y penséz, grant bien vous en venrra,
Mais en tous lieux gardéz vostre personne.
