Balade 289 : Du sens que Dieu donna a Salemon (CCXCIII)
Autre Balade
Du sens que Dieu donna a Salemon
Et du pouoir au grant roy Alixandre,
Du bien Hector, de la force Sanson,
De la loy Dieu soustenir et deffendre,
5 Craindre et amer, et d’umilité prandre,
Com saint Loys le fist a son vivant,
Vous vueille Dieux estrener en donnant
Sa beneiçon et bonne renommee
Ce jour de l’an et de la en avant,
10 Tant que France soit par vous honouree.
Que vous aiéz beauté comme Absalon,
Que vo pouoir puisséz partout estendre,
Si qu’en tous lieus soit doubté vostre nom
Et que faciéz a vous le monde rendre
15 Com les Romains, et a largesce enstendre
Vueilléz toudis, sanz convoiter argent,
Que vous faictes tresor de noble gent.
Améz les bons, pugnissiéz par espee
Les maufaicteurs. Rendéz droit jugement,
20 Tant que France soit par vous honouree 64c
Que vous puisséz vivre en vostre aage bon
De .lx. ans. toutes vertus comprandre.
Estre piteus ou il cherra pardon,
Si que de mal ne vous puist nul reprandre.
25 Mais oultremer puisséz voz voiles tendre
Comme firent Charlemaine et Rolant,
Si c’om die : Loys le Conquerant
Es histoires, et que l’ame sauvee
Soit en la fin : j’en pri Dieu humblement,
30 Tant que France soit par vous honouree.
L’envoy
Prince, donner ne vous sçay autre don.
Prenéz en gré ma petite chançon
Ce jour de l’an, qui vous est presentee.
Et Dieux vous doint honeur, force et renon,
35 Sens et pouoir, de tous biens habandon,
Si que France soit par vous honouree.
