Balade 288 : Vous qui vivéz si gloutement (CCXCII)
Balade comment nousdevons estre sobres pour garder la vie du corps et de l’ame
Vous qui vivéz si gloutement,
Sanz vostre appetit mesurer,
Ne devéz vivre longuement,
Car vous ne pouéz digerer
5 Le trop prins. si vous fault curer
Par medicins l’excés des corps,
Ou vaillainement getter hors,
Comme font les chiens et les loups.
Et ainsi vivéz comme pors :
10 Ne soiéz pas si convoitous.
D’avoir mes excessivement,
Pour delit d’un pou savourer,
Qui destruit corps, ame et argent,
Et qui fait maint povre affamer,
15 Et les grans mangeurs diffamer.
Soyons de charité recors.
Laissiéz ces mangers vilz et ors.
Monstréz vous aux povres pitoux.
Car maint sont par telz excés mors :
20 Ne soiéz pas si convoitous.
Vivéz selon Dieu, sobrement.
Vostre appetit fault rafrener,
Non pas des mangiers seulement,
Mais des grans avoirs amasser, 64b
25 Dont maint veulent plus embracier
Qu’ilz ne doivent, et des tresors.
Et par ce les convient alors
Purgier par medicins crueux,
Dont jamais ne seront ressors :
30 Ne soiéz pas si convoitoux.
L’envoy
Prince, bon fait legierement
Mangier, et passer saigement
Le pas de ce monde doubtoux,
Ou chascun vit dolentement.
35 Dont saint Pol dit a toute gent :
Ne soiéz pas si convoitoux.
