Balade 287 : Pour quoy veult on tant de terre acquerir (CCXCI)
Balade sur ceuls qui au jour d’uy veulent tant acquerir
Pour quoy veult on tant de terre acquerir,
Tant[1] de robes, tant de chevaulx avoir,
[…]
Tant de chasteaulx pour un corps recevoir,
5 Et tant des mes ? Car, pour dire le voir,
C’est grant exil de corps, d’ame et de vie,
Et ce qui fait sur homme avoir envie,
Et dont l’en a veu advenir maint mal.
A chascun doit soufire, quoy qu’on die,
10 Vivre, une chambre, une cote, un cheval.
Qui plus a gens, plus le convient soufrir,
Les gouverner au matin et au soir.
Trop de robes font la bourse apovrir.
Trop de maisons gendrent povre manoir,
15 Car en chascun ne puet sires manoir
Qu’il n’y faille trop de meuble a la die.
Une chambre est d’asséz po establie,
La puéz gesir ou amont ou aval.
Mais a pluseurs avoir ne souffist mie
20 Vivre, une chambre, une cote, un cheval.
Tant en veulent maint avoir et tenir
Que povre en sont, aprés leur mort, leur hoir.
Mieulx les vausist simplement maintenir
Que leurs ames et parens decevoir.
25 Au monde fault leurs debtes remanoir
Pour leurs chevaulx. Contre leur renom crie
Peuple commun, ne nul pour eulx ne prie. 64a
Lors sont boutéz en ce dolereus val,
Et la fenist estat et seignourie,
30 Vivre, une chambre, une cotte, un[2] cheval.
L’envoy
Prince, les gens de moienne lignie
Pour estre seur en moien lieu de pal
Doivent en gré prandre et a chiere lie
Vivre, une chambre, une cotte, un cheval.
[1] Ms. Et tant
[2] Ms. et un
