Balade 286 : Vous qui n’avéz les grans possessions (CCXC)
Autre Balade
Vous qui n’avéz les grans possessions
Et qui n’estes des seigneurs retenus,
Qui offices n’avéz n’elections,
Souviengne vous que vous nasquistes nus,
5 Et jusqu’a cy vous estes maintenus
Des dons de Dieu, qui vous a fait tel grace
Que frans vivéz, sanz ravir, sanz menace,
En paix de cuer : or n’aiéz convoitise
D’acquerir trop : servens sa mort pourchace.
10 Il n’est tresor qui puist valoir franchise.
Qui sert, il a moult de temptacions.
Qui riches est, pour po est pres tenus.
Officiers ont trop d’aflicions,
Car de mains dars sont de langues ferus.
15 Juges aussi : tout mauvais leur court sus,
Et telz gens n’ont fors la nuit d’une glace,
Bien ne repos, car tristesce les glace,
En languissant, par doloreuse emprinse
De convoiter, et pour ce dit Eustace :
20 Il n’est tresor qui puist valoir franchise.
Laisser aler telz tribulacions,
A telz estas n’acomptéz .ii. festus.
Cognoisséz Dieu, fuiéz decepcïons.
Souffise vous que vous soiéz vestus,
25 Que vivre aiéz. Entendéz aux vertus.
Aprenéz art qui bien regner vous face.
Soiéz joieus et aiéz liee face.
Sanz plus vouloir, tel estat vous souffise. 63d
Lors vivres frans, sanz paour et sanz chace :
30 Il n’est tresor qui puist valoir franchise.
L’envoy
Prince, je faiz ci mes conclusions
Qu’en tous estas, au secle et a l’eglise,
A mains perilz, trop de mutacïons :
Il n’est tresor qui puist valoir franchise.
