Balade 285 : Homs de ses maulx ne se puet excuser (CCLXXXIX)
Balade
Homs de ses maulx ne se puet excuser
Quant Dieu lui a tele grace donnee
Qu’a son vouloir puet de franchise user
Contre tout sort et toute destinee.
5 Et ja soit ce que creature nee
Soit encline par constellacion
A bien ou mal, franche discrecion
Pour resister et fuir sa fortune
Le doit mouvoir, car franche eleccion
10 A Dieu donné a chascun et chascune.
Et quant homs puet congnoistre et opposer
Aux corps du ciel, a leur cause causee,
Par consequent il puet bien resister
A leur effect : ce preuve Tholomee.
15 S’autrement fust, no loy fust reprouvee,
Qui donne aux bons remuneracion
Et aux mauvais toute pugnicion :
Un merite eust bien et mal en commune.
Mais franc vouloir, qui fait distinction,
20 A Dieu donné a chacun et chascune
Pour faire bien et le mal eschiver.
Car se la char est a vice enclinee,
Par franc vouloir la puet homs rafrener,
Et par vertu qui lui est ordonnee.
25 Merite a lors, quant malice est domptee.
Arbitre franc est la salvacion
D’ame et de corps et la dampnacion,
Qui puet de soy oster toute infortune.
Et tel pouoir par grant affection
30 A Dieu donné a chascun et chascune.
L’envoy
Prince, moult est tel franchise pesee 63c
Par qui l’ame est ou sauvee ou dampnee,
Qui empesche le souleil et la lune,
Les corps du ciel, leur impression vee.
35 Tel franc vouloir, qui toute chose acree,
A Dieu donné a chascun et chascune.
